გამოცემა: N25 / მიმოხილვის პერიოდი: 1-31 იანვარი, 2021

„აფხაზეთსა და ცხინვალის რეგიონში კრემლის პოლიტიკის მიმოხილვა“ მზადდება პროექტის - „კრემლის პოლიტიკის გზამკვლევი აფხაზეთსა და ცხინვალის რეგიონში“ - ფარგლებში. მიმოხილვის მიზანია მკითხველს აფხაზეთსა და ცხინვალის რეგიონში რუსეთის პოლიტიკასთან დაკავშირებული მნიშვნელოვანი მოვლენების შესახებ ინფორმაცია მივაწოდოთ. მიმოხილვა გამოდის თვეში ერთხელ და გამოადგება გადაწყვეტილების მიმღებთ, საჯარო მოხელეებს, მედიის, საერთაშორისო სამთავრობო და არასამთავრობო ორგანიზაციების წარმომადგენლებსა თუ სხვებს, ვისაც საქართველოს ოკუპირებულ რეგიონებში კრემლის პოლიტიკა აინტერესებს.

2021 წლის იანვრის მნიშვნელოვანი მოვლენები მოკლედ:     

• კურატორები: რუსეთის პრეზიდენტის გადაწყვეტილებით აფხაზეთისა და ცხინვალის რეგიონის გავლენიანმა კურატორმა მიხაილ ბაბიჩმა ეკონომიკური განვითარების სამინისტრო დატოვა.
• „ელჩის ინტერვიუ“: აფხაზეთში რუსეთის „ელჩმა“ კრიტიკული შეფასებები გამოთქვა რუსების მიმართ გაზრდილი კრიმინალისა და რუსებისათვის მოქალაქეობის მინიჭების საკითხზე.
• რუსეთის სამხედრო ძალები: რუსეთის მე-7 და მე-4 სამხედრო ბაზებზე სამხედრო მოსამსახურეების ვაქცინაცია დაიწყო.
• უსაფრთხოების სფეროში თანამშრომლობა: ცხინვალის რეგიონის დე ფაქტო პრეზიდენტი რუსეთის 58-ე საერთო-საჯარისო არმიის მეთაურს შეხვდა.
• სამართალდამცავ სფეროში თანამშრომლობა: რუსეთი და ცხინვალის რეგიონი 2021-2022 წლებში საგარეო-პოლიტიკურ უწყებებს შორის კონსულტაციების გეგმაზე შეთანხმდნენ.
• ეკონომიკის სფეროში თანამშრომლობა: 2021 წლის იანვარში აფხაზეთში რუსული საბანკო ბარათებით განხორციელებული ოპერაციების რაოდენობა, წინა წლის ანალოგიურ პერიოდთან შედარებით, მკვეთრად  გაიზარდა.
• ენერგეტიკის სფეროში თანამშრომლობა: 20 იანვარს ენგურჰესზე სარეაბილიტაციო სამუშაოების დაწყების გამო აფხაზეთმა ელექტროენერგიის მიღება რუსეთიდან დაიწყო.
• „რბილი ძალა“:  აფხაზეთსა და ცხინვალის რეგიონში მალე დაიწყება 2021-22 სასწავლო წლის შესარჩევი კონკურსი რუსულ უნივერსიტეტებში სწავლისთვის.

კურატორები

2021 წელი აფხაზეთისა და ცხინვალის რეგიონის მიმართულებით მნიშვნელოვანი საკადრო გადაწყვეტილებებით დაიწყო:

• 2 იანვარს რუსეთის პრეზიდენტის ბრძანებით მიხაილ პეტრაკოვი დაინიშნა რუსეთის ფედერაციის პრეზიდენტის სპეციალურ წარმომადგენლად მეზობელ სახელმწიფოებთან - დამოუკიდებელი სახელმწიფოების თანამეგობრობის წევრებთან რუსეთის ფედერაციის სახელმწიფო საზღვრის დელიმიტაციისა და დემარკაციის საკითხებში. პეტრაკოვს ამავე ბრძანებით დაევალა საქართველოსთან და აფხაზეთისა და ცხინვალის რეგიონის დე ფაქტო რესპუბლიკებთან „საზღვრების“ დადგენაც. პეტრაკოვი 1982 წლიდან დიპლომატიურ სამსახურშია. მისი შემდგომი წლების საქმიანობა პირდაპირ იქნება დაკავშირებული საქართველოსთან, რადგან იგი საქართველოს ოკუპირებულ რეგიონებთან „საზღვრების“ დადგენის უკანონო პროცესში იქნება ჩართული.
• 21 იანვარს აფხაზეთში რუსეთის „ელჩი“ ალექსეი დვინიანინი აფხაზეთის დე ფაქტო პრეზიდენტ ასლან ბჟანიას შეხვდა. „ელჩმა“ ბჟანიას აფხაზეთში რუსეთის ფედერაციის უშიშროების ფედერალური სამსახურის სასაზღვრო სამმართველოს ახალი უფროსი ანდრეი კუდიმოვი წარუდგინა. კუდიმოვმა ამ პოსტზე ალექსეი ტრუბეცკი შეცვალა.

მიხაილ ბაბიჩის ვიზიტი სოხუმში. წყარო: რუსეთის ეკონომიკის განვითარების სამინისტრო

• რუსეთის პრეზიდენტის 20 იანვრის ბრძანებით, რუსეთის ეკონომიკური განვითარების მინისტრის პირველი მოადგილე მიხაილ ბაბიჩი სამხედრო-ტექნიკური თანამშრომლობის ფედერალური სამსახურის უფროსის მოადგილედ დაინიშნა. 2020 წლის 20 იანვარს ჩრდილოეთ კავკასიის საქმეთა სამინისტროს გაუქმების შემდეგ, ბაბიჩი აფხაზეთსა და ცხინვალის რეგიონში რუსეთის მიერ დაფინანსებული სოციალურ-ეკონომიკური პროექტების განხორციელებას კურირებდა. თავისი მანდატის ფარგლებში ბაბიჩი ხშირად ხვდებოდა საქართველოს ოკუპირებული რეგიონების დე ფაქტო ლიდერებს. გასულ წელს, პანდემიის მიუხედავად, იგი აფხაზეთსა და ცხინვალის რეგიონშიც იმყოფებოდა.

„ელჩის” ბრალდებები

2021 წლის 13 იანვარს აფხაზეთში რუსეთის „ელჩმა“ ალექსეი დვინიანინმა ინტერვიუ მისცა აფხაზურ ტელევიზიას. ინტერვიუს დროს „ელჩმა“ შეშფოთება გამოთქვა რუსი ტურისტების, ბიზნესმენებისა და უბრალო მოქალაქეების მიმართ ჩადენილი მრავალრიცხოვანი კრიმინალური ფაქტებისა და მათზე ადგილობრივი სასამართლო სისტემის შენელებული რეაგირების გამო. მან ასევე მწვავედ ისაუბრა ადგილობრივ დე ფაქტო პარლამენტსა და მთავრობაში ეთნიკური რუსების მცირე წარმომადგენლობისა და რუსებისთვის აფხაზეთის მოქალაქეობის მინიჭებასთან დაკავშირებულ საკითხებზე.

აღნიშნული საკითხები დიდი ხანია დღის წესრიგშია. დვინიანინის წინამორბედი სემიონ გრიგორიევიც მწვავედ აკრიტიკებდა აფზახეთის დე ფაქტო ხელისუფლებას რუსეთის მოქალაქეების მიმართ გახშირებული კრიმინალის გამო, რის გამოც აფხაზური საზოგადოების ნაწილმა მას შიდა საქმეებში ჩარევაშიც კი დასდო ბრალი. დვინიანინის კრიტიკული შეფასებები დროში ემთხვევა რუსეთის მხრიდან აფხაზეთის დე ფაქტო ხელისუფლებაზე გაზრდილ ზეწოლას პრობლემური საკითხების (რუსეთის მოქალაქეებისთვის აფხაზეთის მოქალაქეობის მინიჭება, აფხაზეთში უძრავი ქონების შეძენის შესაძლებლობა, კრიმინალთან ბრძოლა) დროულ მოგვარებასთან დაკავშირებით.

სამხედრო წვრთნები

სამხედრო წვრთნები აფხაზეთში მე-7 სამხედრო ბაზაზე

• ნაგვალოუსა და წებელდის სამხედრო პოლიგონებზე ტანკსაწინააღმდეგო ქვედანაყოფის სამხედრო მოსამსახურეებმა ივარჯიშეს. სწავლება მთიანი რელიეფის პირობებში ჩატარდა.
• საჰაერო თავდაცვის სპეციალისტებმა შავი ზღვის სანაპიროზე აფხაზეთის საჰაერო სივრცის დაცვაში ივარჯიშეს.
• სამხედრო მოსამსახურეებმა ტყის ხანძრების ჩაქრობაში ივარჯიშეს. წვრთნაში მონაწილეობდნენ საგანგებო სიტუაციების მართვის სპეციალისტებიც.
• მე-7 სამხედრო ბაზის სამხედრო მოსამსახურეებმა და დე ფაქტო აფხაზეთის რესპუბლიკის შეიარაღებულმა ძალებმა ერთობლივი წვრთნა ჩაატარეს. საბრძოლო მომზადების გეგმიური სწავლება ერთი კვირის მანძილზე მიმდინარეობდა.

მე-7 სამხედრო ბაზის სხვა ამბები

• სამხედრო ბაზაზე სამხედრო მოსამსახურეების გეგმიური ვაქცინაცია დაიწყო. ვაქცინაციის გეგმის თანახმად, პირველი დოზები მიიღეს ცვლაში მყოფმა სამხედრო მოსამსახურეებმა, სამედიცინო პერსონალმა და სამხედრო ბაზის ხელმძღვანელობამ.
• სამხედრო ბაზაზე 2020 წლის საშემოდგომო გაწვევის ახალწვეულთა ბოლო ჯგუფმა სამხედრო ფიცი დადო, რის შემდეგაც ისინი შესაბამის ქვედანაყოფებში გაანაწილეს.

სამხედრო წვრთნები ცხინვალის რეგიონში მე-4 სამხედრო ბაზაზე

• მოტომსროლელებმა საბრძოლო სროლები შეასრულეს. სწავლების ფარგლებში სამხედრო მოსამსახურეებმა უპილოტო საფრენი აპარატების მეშვეობით აღმოაჩინეს და გაანადგურეს პირობითი მოწინააღმდეგის ჯგუფები.
• მზვერავებმა პირობითი მოწინააღმდეგის შეტევა მოიგერიეს. სწავლების ფარგლებში სამხედრო მოსამსახურეებმა ალყაში მოაქციეს პირობითი მოწინააღმდეგე, რომელიც მე-4 სამხედრო ბაზის ტერიტორიაზე იყო შეპარული საკონტროლო-ტექნიკური პუნქტისა და საბრძოლო მანქანების პარკის ხელში ჩაგდების მიზნით.
• ძარწემის სამხედრო პოლიგონზე ტანკისტებმა ივარჯიშეს. წვრთნის ფარგლებში სამხედრო მოსამსახურეებმა გაანადგურეს ახალი ტიპის მოძრავი სამიზნეები - დანაღმული ავტომობილები.
• მე-4 სამხედრო ბაზაზე სამხედრო მედიკოსებმა ივარჯიშეს. წვრთნის ფარგლებში სამხედრო ექიმებმა ჩაატარეს სამძებრო სამუშაოები და მოახდინეს პირობითად დაშავებული სამხედრო მოსამსახურეების ევაკუაცია.

მე-4 სამხედრო ბაზის სხვა ამბები

• სამხედრო მოსამსახურეთა შვილებისთვის სამბოში შეჯიბრება ჩატარდა.
• მე-4 სამხედრო ბაზაზე სამხედრო მოსამსახურეების ვაქცინაცია დაიწყო. სამხედრო ბაზაზე უკვე 800-ზე მეტმა სამხედრო მოსამსახურემ მიიღო კორონავირუსის საწინააღმდეგო ვაქცინა.

2021 წლის იანვარში აფხაზეთსა და ცხინვალის რეგიონში რუსეთის სამხედრო ძალების საქმიანობის დეტალური მიმოხილვა იხ. აქ.

უსაფრთხოების სფეროში თანამშრომლობა

ცხინვალის რეგიონის დე ფაქტო პრეზიდენტი ანატოლი ბიბილოვი რუსეთის 58-ე საერთო-საჯარისო არმიის მეთაურს, გენერალ-მაიორ მიხაილ ზუსკოს შეხვდა. 58-ე არმიის დაქვემდებარებაშია ცხინვალის რეგიონში განთავსებული მე-4 სამხედრო ბაზა. შეხვედრის მიზანი 2021 წელს უსაფრთხოების სფეროში თანამშრომლობის გაღრმავება იყო. მსგავსი შეხვედრა გასული წლის ნოემბერშიც გაიმართა.

საგარეო პოლიტიკის კოორდინაცია

რუსეთის საგარეო საქმეთა მინისტრმა სერგეი ლავროვმა ცხინვალის რეგიონის დე ფაქტო საგარეო საქმეთა მინისტრის მოვალეობის შემსრულებელს დიმიტრი მედოევს უმასპინძლა. მხარეებმა ხელი მოაწერეს „2021-2022 წლებში საგარეო-პოლიტიკურ უწყებებს შორის კონსულტაციების გეგმას“. მედოევი ასევე დააჯილდოეს რუსეთის საგარეო საქმეთა სამინისტროს სამკერდე ნიშნით „ურთიერთქმედებისათვის“.

ეკონომიკის სფეროში თანამშრომლობა

აფხაზეთის დე ფაქტო ეროვნული ბანკის ცნობით, 2021 წლის 1-10 იანვრის პერიოდში რუსული საბანკო ბარათებით განხორციელებული ოპერაციების რაოდენობა, წინა წლის ანალოგიურ პერიოდთან შედარებით, 88.3 მლნ რუბლით (69.5%) გაიზარდა. გადახდები აფხაზეთის საგადახდო სისტემა „АПРА“-ს საშუალებით განხორციელდა. სულ რუსული საბანკო ბარათებით 216 მლნ რუბლის ოპერაციები განხორციელდა. „АПРА“-ს ინფრასტრუქტურა აფხაზეთში 2500 ტერმინალს მოიცავს.

ენერგეტიკის სფეროში თანამშრომლობა

2021 წელს აფხაზეთი სერიოზული ენერგეტიკული გამოწვევებით შეხვდა. 20 იანვარს რეაბილიტაციის მიზნით რამდენიმე თვით მუშაობა შეწყვიტა ენგურჰესმა, რომელიც აფხაზეთის ელექტროენერგიით მომარაგების მთავარი წყაროა. კრიზისის დასაძლევად დე ფაქტო მთავრობამ შეზღუდა კრიპტოვალუტების წარმოება და ელექტროენერგიის მიწოდებაზე გრაფიკი დააწესა. ამჟამად აფხაზეთი ელექტროენერგიას რუსეთიდან იღებს. აფხაზეთი, დაახლოებით, 10.5 მლნ კილოვატსაათ ელექტროენერგიას მოიხმარს. სულ შეთანხმებულია რუსეთიდან 800 მლნ კილოვატსაათი ელექტროენერგიის მიღება, რაც არსებული მოხმარების პირობებში შეიძლება საკმარისი არ იყოს.

რუსეთის „რბილი ძალა“                       

შესარჩევი კონკურსი რუსულ უნივერსიტეტებში სწავლისთვის

ცხინვალის რეგიონში მალე დაიწყება 2021-22 სასწავლო წლის შესარჩევი კონკურსი რუსულ უნივერსიტეტებში სწავლისთვის. ცხინვალის რეგიონში „როსსოტრუდნიჩესტვოს“ წარმომადგენლობამ გამოაქვეყნა იმ სპეციალობების ჩამონათვალი, რომლებიც შეესაბამება საგანმანათლებლო კვოტას რუსულ უნივერსიტეტებში სწავლისთვის 2021-22 სასწავლო წელს. მათ შორისაა გამოყენებითი მათემატიკა, სტატისტიკა, საინფორმაციო სისტემები და ტექნოლოგია, ელექტროენერგეტიკა და ელექტროტექნოლოგია და სხვა.

დაიწყო რეგისტრაცია რუსულ უნივერსიტეტებში სწავლის მსურველთათვის

20 იანვარს აფხაზეთში „როსსოტრუდნიჩესტვოს“ წარმომადგენლობის ვებგვერდზე გამოქვეყნდა ინფორმაცია რეგისტრაციის დაწყების შესახებ რუსულ უნივერსიტეტებში სწავლის მსურველთათვის. 2020 წელს „როსსოტრუდნიჩესტვოს“ მეშვეობით 50 აბიტურიენტი ჩაირიცხა რუსეთის უმაღლეს საგანმანათლებლო დაწესებულებებში. მიმდინარე წელს ცხინვალის რეგიონის აბიტურიენტებისთვის 18 ადგილია გამოყოფილი.

ცხინვალში ჟურნალ „რუსული სიტყვა სამხრეთ ოსეთში“ პრეზენტაცია გაიმართა

ცხინვალის რეგიონში ჟურნალ „რუსული სიტყვა სამხრეთ ოსეთში“ პრეზენტაცია გაიმართა. აღნიშნული ჟურნალი 2020 წელს გამოვიდა და „ოსების გენოციდის“ 100-წლისთავს მიეძღვნა, თუმცა მისი მე-18 ნომრის პრეზენტაცია მიმდინარე წლის დასაწყისში შედგა.

ვადიმ ჩეხამ „როსსოტრუდნიჩესტვოს“ ერთ-ერთი კონკურსის შედეგები შეაჯამა

აფხაზეთში „როსსოტრუდნიჩესტვოს“ წარმომადგენლობის ხელმძღვანელმა ვადიმ ჩეხამ მორიგი კონკურსის შედეგები შეაჯამა. კონკურსი სახელად „რა ვიცი ქვეყანაზე, რომელშიც ვცხოვრობ და ვსწავლობ“ 2020 წლის 7-21 დეკემბერს გაიმართა. მისი თემატიკა იყო რუსულ-აფხაზური ისტორიული და კულტურული მემკვიდრეობა, კერძოდ, აფხაზური „სახელმწიფოებრიობის“ პირველი გამოვლინებები, ისტორიულ-კულტურული ძეგლები, რუსეთ-აფხაზეთის თანამშრომლობა და სხვა.

რუსეთმა აფხაზეთის „ეროვნულ“ ბიბლიოთეკას წიგნები გადასცა

რუსეთის ცენტრალურმა ბიბლიოთეკამ აფხაზეთის „ეროვნულ“ ბიბლიოთეკას წიგნები გადასცა. „ეროვნულ“ ბიბლიოთეკას გადაეცა 300 დასახელების წიგნი, რომლებიც ბიბლიოთეკის თანამშრომლებმა შეარჩიეს.

ცხინვალში სამხედროებმა ღია გაკვეთილები ჩაატარეს

ღია გაკვეთილი. წყარო: cominf.org

ცხინვალის რეგიონში რუსეთის ფედერაციის მე-4 სამხედრო ბაზის სამხედრო მოსამსახურეებმა ლენინგრადის ბლოკადის დასრულებასთან დაკავშირებით ქალაქ ცხინვალის სკოლებში ღია გაკვეთილები ჩაატარეს. ღია გაკვეთილები ახალგაზრდების საბრძოლო-პატრიოტული სულისკვეთებით აღზრდის პროგრამის ფარგლებში ჩატარდა.