ვიტალი გუდინი

რუსეთის ფედერაციის ეკონომიკური განვითარების სამინისტროს სპეციალური პროგრამებისა და პროექტების დეპარტამენტის დირექტორი

ზოგადი ბიოგრაფიული ცნობები

• ვიტალი გუდინი დაიბადა 1959 წლის 6 მარტს ქ. მოსკოვში, რუსეთის სფსრ-ში, საბჭოთა კავშირში.
• 1982 წელს დაამთავრა ბაუმანის სახელობის მოსკოვის უმაღლესი ტექნიკური სასწავლებელი „საფრენი აპარატების წარმოების“ სპეციალობით. მინიჭებული აქვს „ინჟინერ-მექანიკოსის“ კვალიფიკაცია.
• 1986-1988 წლებში საბჭოთა კავშირის შეიარაღებულ ძალებში მსახურობდა.
• 1995 წელს დაამთავრა საგარეო ვაჭრობის რუსეთის აკადემია „საერთაშორისო ეკონომიკური ურთიერთობები. მსოფლიო ეკონომიკა“ სპეციალობით. მინიჭებული აქვს „უცხო ენის მცოდნე ეკონიმისტის“ კვალიფიკაცია.

პროფესიული კარიერა

• 1982 წელს სასწავლებლის დამთავრების შემდეგ საავიაციო ავტომატიკის სამეცნიერო-კვლევით ინსტიტუტში ინჟინრად დაიწყო მუშაობა. საბჭოთა ჯარიდან დაბრუნების შემდეგ კვლავ ძველ სამსახურს დაუბრუნდა და წლების განმავლობაში სხვადასხვა კატეგორიის ინჟინერ-კონსტრუქტორად მუშაობდა.
• 1995-1999 წლებში კომერციულ სტრუქტურებში მუშაობდა. მათ შორის, სააქციო საზოგადოება „რუსულ-ევროპული სავაჭრო სახლი - АККОР“-ში მთავარ სპეციალისტად, სააქციო საზოგადოება „სამსონ“-ში  კომერციულ დირექტორად.
• 2000-2004 წლებში დიდ ბრიტანეთში რუსეთის ფედერაციის სავაჭრო წარმომადგენლობაში ექსპერტის პოზიციაზე მუშაობდა.
• 2004-2012 წლებში ეკონომიკური განვითარების სამინისტროში მუშაობდა. სამინისტროში კარიერა სატარიფო რეგულირების დეპარტამენტში განყოფილების უფროსის თანამდებობიდან დაიწყო. შემდგომში ჯერ საგარეო სავაჭრო საქმიანობის სახელმწიფო რეგულირების დეპარტამენტის დირექტორის მოადგილე, შემდეგ კი - დირექტორი იყო.
• 2012-2016 წლებში ევრაზიის ეკონომიკურ საბჭოში საბაჟო-სატარიფო და არასატარიფო რეგულირების დეპარტამენტის დირექტორი იყო.
• 2016-2017 წლებში რუსეთის ფედერაციის ცენტრალურ ბანკში საერთაშორისო თანამშრომლობისა და საზოგადოებრივი კომუნიკაციების დეპარტამენტში საერთაშორისო თანამშრომლობის კოორდინაციის სამმართველოს უფროსი იყო.
• 2017 წლის აპრილიდან ეკონომიკური განვითარების სამინისტროს დაუბრუნდა, სადაც საგარეო ეკონომიკური საქმიანობის რეგულირებისა და განვითარების დეპარტამენტის დირექტორი იყო.
• 2019 წლის 16 აპრილიდან გუდინი სახალინის ოლქის მთავრობის თავმჯდომარის მოადგილის - ქ. მოსკოვში სახალინის ოლქის გუბერნატორისა და მთავრობის წარმომადგენლობის ხელმძღვანელის მოვალეობას ასრულებდა.
• 2020 წლის 18 სექტემბერს გუდინი ეკონომიკური განვითარების სამინისტროში მესამეჯერ დაბრუნდა. იგი ეკონომიკური განვითარების სამინისტროს სპეციალური პროგრამებისა და პროექტების დეპარტამენტის დირექტორად დაინიშნა. გუდინმა ამ თანამდებობაზე ალექსეი სუხოვი შეცვალა. გუდინის პასუხისმგებლობის სფეროში შედის აფხაზეთსა და ცხინვალის რეგიონში რუსული დაფინანსებით მიმდინარე პროგრამების განხორციელების მონიტორინგი. 

აფხაზეთთან ურთიერთობა

• 2021 წლის 2 სექტემბერს აფხაზეთის დე ფაქტო ვიცე-პრემიერმა და ეკონომიკის მინისტრმა კრისტინა ოზგანმა რუსეთის ეკონომიკური განვითარების მინისტრის მოადგილე დიმიტრი ვოლვაჩი და  ენერგეტიკის მინისტრის მოადგილე ევგენი გრაბჩაკი მიიღო. რუსეთის დელეგაციის წევრები იყვნენ გუდინი და მისი მოადგილე ანტონ მელნიკი. ვიზიტის ფარგლებში რუსეთის დელეგაციამ  საინვესტიციო პროგრამის ფარგლებში აღდგენილი სოციალური და ინფრასტრუქტურული ობიექტები შეამოწმა. რუსეთის დელეგაცია აფხაზეთის დე ფაქტო პრეზიდენტმა ასლან ბჟანიამაც მიიღო.
• 2021 წლის 13 სექტემბერს აფხაზეთს გუდინი და მისი მოადგილე ანტონ მელნიკი  ესტუმრნენ. ვიზიტის მიზანი, საინვესტიციო პროგრამის მიმდინარეობის უფრო დეტალური შესწავლა იყო. სტუმრები დე ფაქტო პრემიერ-მინისტრ ალექსანდრე ანქვაბსაც შეხვდნენ.
• 2021 წლის 17 ნოემბერს აფხაზეთის დე ფაქტო პრემიერ-მინისტრმა ალექსანდრე ანქვაბმა სამუშაო შეხვედრა გამართა რუსეთის ფედერაციის ეკონომიკური განვითარებისა და ტრანსპორტის სამინისტროს წარმომადგენლებთან. დელეგაციის ხელმძღვანელი გუდინი იყო. შეხვედრაზე დეტალურად განიხილეს მიმდინარე საინვესტიციო პროგრამის პრობლემური საკითხები, ასევე იმსჯელეს 2022-2025 წლების სოციალურ-ეკონომიკური განვითარების პროგრამის პროექტზე და კოდორის ხეობაში საგზაო და სატრანსპორტო ინფრასტრუქტურის რეკონსტრუქციის პერსპექტივებზე. რუსეთის ეკონომიკური განვითარების სამინისტროს დელეგაციამ ქვესადგურ „ბზიფ-220“-ის სარემონტო სამუშაოების მიმდინარეობაც შეამოწმა. დელეგაციამ კოდორის ხეობის სატრანსპორტო ინფრასტრუქტურის მდგომარეობაც შეაფასა და მისი შემდგომი რეკონსტრუქციის პრიორიტეტები დაადგინა.
• 2022 წლის 31 იანვარს აფხაზეთის დე ფაქტო ეკონომიკის მინისტრი კრისტინა ოზგანი მოსკოვში რუსეთის ეკონომიკური განვითარების მინისტრის მოადგილეს დიმიტრი ვოლვაჩს შეხვდა. შეხვედრაში გუდინიც მონაწილეობდა. შეხვედრაზე აფხაზეთსა და რუსეთს შორის ერთიანი სოციალური და ეკონომიკური სივრცის ფორმირების პროგრამის განხორციელების საკითხები განიხილეს.
• 2022 წლის 9 მარტს აფხაზეთის დე ფაქტო პრეზიდენტი ასლან ბჟანია რუსეთის ეკონომიკური განვითარების მინისტრის მოადგილეს დიმიტრი ვოლვაჩს სოხუმში შეხვდა. რუსულ დელეგაციაში შედიოდნენ გუდინი და სამინისტროს სპეციალური პროგრამებისა და პროექტების დეპარტამენტის დირექტორი მოადგილე ანტონ მელნიკი. შეხვედრაზე განიხილეს აფხაზეთსა და რუსეთს შორის ეკონომიკური თანამშრომლობის საკითხები.
• 2022 წლის 28-29 ივნისს რუსეთის ეკონომიკური განვითარების მინისტრის მოადგილე დიმიტრი ვოლვაჩი სოხუმს ეწვია. ვიზიტის პირველ დღეს ვოლვაჩმა რუსული დაფინანსებით მიმდინარე პროექტები მოინახულა. ვოლვაჩის დელეგაციაში შედიოდნენ გუდინი და სამინისტროს სპეციალური პროგრამებისა და პროექტების დეპარტამენტის დირექტორის მოადგილე ანტონ მელნიკი.
• 2022 წლის 4 ოქტომბერს აფხაზეთის დე ფაქტო პრემიერ-მინისტრი ალექსანდრე ანქვაბი, ვიცე-პრემიერები კრისტინა ოზგანი და ვლადიმირ დელბა და კაპიტალური მშენებლობის სამმართველოს უფროსი - ტიმურ აგრბა რუსეთის ეკონომიკური განვითარების სამინისტროს წარმომადგენლებს შეხვდნენ. რუსეთის დელეგაციას წარმოადგენდნენ გუდინი, მისი მოადგილე - ანტონ მელნიკი და მინისტრის თანაშემწე - მიხეილ მუხორტოვი. შეხვედრას ასევე ესწრებოდა რუსეთის „ელჩი“ მიხაილ შურგალინი და „საელჩოს“ მრჩეველი - მაქსიმ ლიტვინოვი. „მხარეებმა“ განიხილეს აფხაზეთის დე ფაქტო რესპუბლიკის სოციალურ-ეკონომიკური განვითარების მხარდამჭერი საინვესტიციო პროგრამის განხორციელების, კანონმდებლობის ჰარმონიზაციის, ენერგეტიკის სფეროსა და სხვა საკითხები.

ცხინვალის რეგიონთან ურთიერთობა

• 2020 წლის 2-3 ოქტომბერს რუსეთის ფედერაციის ეკონომიკური განვითარების მინისტრის პირველი მოადგილე მიხეილ ბაბიჩი ცხინვალის რეგიონში ორდღიანი სამუშაო ვიზიტით იმყოფებოდა. ვიზიტის ფარგლებში ბაბიჩი შეხვდა ცხინვალის რეგიონის დე ფაქტო პრეზიდენტ ანატოლი ბიბილოვსა და დე ფაქტო მთავრობის წევრებს. მან ასევე მოინახულა რუსეთის დაფინანსებით განხორციელებული და მიმდინარე პროექტები. მისი დელეგაციის შემადგენლობაში იყო გუდინიც.

• 2021 წლის 26 აპრილს ცხინვალის რეგიონის დე ფაქტო პრეზიდენტმა ანატოლი ბიბილოვმა სოციალურ-ეკონომიკური თანამშრომლობის ფორმატში რუსეთის წარმომადგენლებთან შეხვედრა გამართა. რუსეთის მხრიდან წარმოდგენილნი იყვნენ ეკონომიკური განვითარების, შრომის, განათლებისა და მეცნიერების, ჯანდაცვის სამინისტროები და სხვა ინსტიტუტები. დელეგაციას გუდინი ხელმძღვანელობდა. შეხვედრაზე რუსეთის საინვესტიციო პროგრამის განხორციელების მიმდინარეობაზე იმსჯელეს.

• 2021 წლის 23 აგვისტოს ცხინვალში რუსეთის დელეგაციასთან ცხინვალის რეგიონის სოციალურ-ეკონომიკური განვითარების საკითხები განიხილეს. შეხვედრაზე ცხინვალის რეგიონის „სოციალურ-ეკონომიკური განვითარებისთვის ფინანსური მხარდაჭერის გამოყოფაზე“, საინვესტიციო პროგრამის განხორციელებასა და ე.წ. „საბაჟო კანონმდებლობის ჰარმონიზაციაზე“ იმსჯელეს. რუსეთის დელეგაციას გუდინი ხელმძღვანელობდა. დელეგაციის წევრები იყვნენ: ეკონომიკური განვითარების სამინისტროს სპეციალური პროგრამებისა და პროექტების დეპარტამენტის დირექტორის მოადგილე ანტონ მელნიკი და ეკონომიკური განვითარების სამინისტროს სპეციალური პროგრამებისა და პროექტების დეპარტამენტის „სამხრეთ ოსეთის რესპუბლიკაში“ საბიუჯეტო ინვესტიციებისა და საინვესტიციო საქმიანობის მხარდაჭერის განყოფილების უფროსი - მაქსიმ სმირნოვი. 24 აგვისტოს რუსეთის დელეგაციამ ცხინვალსა და კვაისაში მშენებარე პროექტები მოინახულა.

• 2021 წლის 1 ოქტომბერს ორდღიანი სამუშაო ვიზიტით ცხინვალის რეგიონს რუსეთის ეკონომიკური განვითარების სამინისტროს დელეგაცია ეწვია, რომელსაც სათავეში მინისტრის მოადგილე დიმიტრი ვოლვაჩი ედგა. დელეგაციის შემადგენლობაში შედიოდნენ გუდინი მისი მოადგილე ანტონ მელნიკი. ვიზიტის მთავარი მიზანი საინვესტიციო პროგრამაში შეტანილი ობიექტების შემოწმება იყო. ვიზიტის პირველ დღეს რუსეთის დელეგაციამ ოს „კოლეგებთან“ ერთად ცხინვალის N3 საჯარო სკოლა მოინახულა, რომლის აღდგენაც სექტემბერში დასრულდა. იმავე დღეს რუსეთისა და ცხინვალის რეგიონის სოციალურ-ეკონომიკური თანამშრომლობის შესახებ სამუშაო შეხვედრა გაიმართა, რომელშიც დე ფაქტო პრეზიდენტი ანატოლი ბიბილოვი იღებდა მონაწილეობას. მეორე დღეს რუსეთის დელეგაციამ ცხინვალის რეგიონის დე ფაქტო პრემიერ-მინისტრ გენადი ბეკოევთან ერთად „სამხრეთ ოსეთის სახელმწიფო უნივერსიტეტი“ და ცხინვალის ახალი სამშობიარო დაათვალიერა.

• 2022 წლის 23 ივნისს ცხინვალის რეგიონის დე ფაქტო პრემიერ-მინისტრმა კონსტანტინ ჯუსოევმა რუსეთის დელეგაცია მიიღო, რომლის ხელმძღვანელიც გუდინი იყო. დელეგაციის წევრები იყვნენ ანტონ მელნიკი, სპეციალური პროგრამებისა და პროექტების დეპარტამენტის დირექტორის მოადგილე და მაქსიმ სმირნოვი, სპეციალური პროგრამებისა და პროექტების დეპარტამენტის სამხრეთ ოსეთის რესპუბლიკაში საბიუჯეტო ინვესტიციებისა და საინვესტიციო საქმიანობის მხარდაჭერის განყოფილების უფროსი. შეხვედრაზე 2022-2022 წლების საინვესტიციო პროგრამის მიმდინარეობა და 2023-2025 წლების საინვესტიციო პროგრამის ფორმირების საკითხებიც განიხილეს.

• 2022 წლის 16 სექტემბერს ცხინვალში გაიმართა ცხინვალის რეგიონის დე ფაქტო მთავრობის შეხვედრა რუსეთის ეკონომიკური განვითარების სამინისტროს დელეგაციასთან. დე ფაქტო მთავრობის თავმჯდომარე კონსტანტინე ჯუსოევი შეხვდა რუსეთის ეკონომიკური განვითარების სამინისტროს თანამშრომელთა ჯგუფს, რომელსაც ხელმძღვანელობდა გუდინი. რუსეთის მხრიდან შეხვედრაში მონაწილეობა მიიღეს გუდინის მოადგილეებმა - ანტონ მელნიკმა და იულია სუხოვერხოვამ.  

• 2023 წლის 31 იანვარს დე ფაქტო რესპუბლიკის მთავრობის თავმჯდომარე, კონსტანინე ჯუსოევი მოსკოვში სამუშაო ვიზიტის ფარგლებში რუსეთის სოფლის მეურნეობის მინისტრს, დიმიტრი პატრუშევს შეხვდა. შეხვედრაში გუდინიც მონაწილეობდა.