გამოცემა N4 / მიმოხილვის პერიოდი: 1-31 ივლისი, 2021 / ავტორი: ნიკა კრაწაშვილი

„აფხაზეთსა და ცხინვალის რეგიონთან რუსეთის ეკონომიკური ურთიერთობების მიმოხილვა“ მზადდება პროექტის - „კრემლის პოლიტიკის გზამკვლევი აფხაზეთსა და ცხინვალის რეგიონში“ ფარგლებში. მიმოხილვის მიზანია მკითხველისთვის ინფორმაციის მიწოდება აფხაზეთსა და ცხინვალის რეგიონთან რუსეთის ეკონომიკური ურთიერთობების სხვადასხვა სფეროს შესახებ. მიმოხილვა გამოდის თვეში ერთხელ და გამოადგება გადაწყვეტილების მიმღებთ, საჯარო მოხელეებს, მედიის, საერთაშორისო სამთავრობო და არასამთავრობო ორგანიზაციების წარმომადგენლებსა თუ სხვებს, ვისაც საქართველოს ოკუპირებულ რეგიონებში კრემლის პოლიტიკა აინტერესებთ.

რუსეთ-აფხაზეთის ეკონომიკური ურთიერთობები

„პრეზიდენტის“ მოსკოვში ვიზიტი

29 ივლისს აფხაზეთის დე ფაქტო პრეზიდენტი ასლან ბჟანია მოსკოვს ესტუმრა. ბჟანია რუსეთის პრეზიდენტის ადმინისტრაციის უფროსის მოადგილე - დიმიტრი კოზაკს შეხვდა, რომელიც აფხაზეთისა და ცხინვალის რეგიონის ყველაზე გავლენიანი კურატორია. შეხვედრაზე სოციალურ-ეკონომიკური საკითხებიც განიხილეს, მათ შორის: აფხაზეთში კორონავირუსით ინფიცირებულთა რაოდენობის ზრდის ფონზე დახმარების, ვაქცინის ახალი პარტიის მიწოდების, ივლისში სტიქიური უბედურებების შედეგად მიყენებული ზიანის ლიკვიდაციაში დახმარებისა და რუსეთის მიერ დაფინანსებული საინვესტიციო პროგრამის განხორციელებასთან დაკავშირებული საკითხები.  ვიზიტის მეორე დღეს, ბჟანია რუსეთის მთავრობის ვიცე-პრემიერს ალექსანდრ ნოვაკს შეხვდა. შეხვედრაზე აფხაზეთის ენერგოუზრუნველყოფის ოპტიმიზაციის საგზაო რუკის განხორციელებისა და აფხაზეთის გაზიფიკაციის გენერალური სქემის შემუშავების საკითხები განიხილეს.

თანამშრომლობის მემორანდუმი

აფხაზეთის დე ფაქტო ვიცე-პრემიერმა და ეკონომიკის მინისტრმა კრისტინა ოზგანმა და რუსეთის ეკონომიკური განვითარების მინისტრმა მაქსიმ რეშეტნიკოვმა მოსკოვში ხელი მოაწერეს მემორანდუმს პროგრამულ-მიზნობრივი მართვის გაუმჯობესების სფეროში თანამშრომლობის შესახებ. მემორანდუმს ხელი მოეწერა ერთიანი სოციალურ-ეკონომიკური სივრცის ფორმირების პროგრამის განხორციელებისა და ორი „ქვეყნის“ კანონმდებლობის ჰარმონიზაციის ფარგლებში.

საერთაშორისო ღონისძიებები

• კურსკის სავაჭრო და სამრეწველო პალატის მიწვევით აფხაზეთის „სავაჭრო და სამრეწველო პალატის“ წარმომადგენლები მე-20 რეგიონთაშორის საბითუმო და საცალო გამოფენაში - „Курская Коренская ярмарка – 2021“ მონაწილეობდნენ. აფხაზეთი გამოფენაში უკვე მეექვსე წელია მონაწილეობს. აფხაზურ სტენდზე სხვადასხვა კომპანიის ნაწარმი იყო წარმოდგენილი.

კურსკის გამოფენა 2021. წყარო: Abkhazinform

• აფხაზეთის წარმომადგენლები - დე ფაქტო საგარეო საქმეთა მინისტრი დაურ კოვე და დე ფაქტო ტურიზმის მინისტრი თეიმურაზ ხიშბა, თათრეთის დედაქალაქში მე-12 საერთაშორისო ეკონომიკურ სამიტში - „Россия — Исламский мир: KazanSummit 2021“ მონაწილეობდნენ. სამიტი რუსეთისა და ისლამური სამყაროს სახელმწიფოების ეკონომიკური თანამშრომლობის მთავარ პლატფორმად ითვლება, რომელსაც 2009 წელს ჩაეყარა საფუძველი.

რუსული ინვესტიციები

ბჟანიას განცხადებით, ბიჭვინთაში რუსი ინვესტორების დაფინანსებით აფხაზეთის მასშტაბით უდიდესი სანატორიუმი აშენდება. ბჟანიას თქმით, რუსული ინვესტიცია დაახლოებით 10 მლრდ რუბლი იქნება. ასევე ბჟანიას თქმით, კრასნოდარის მხარეში მდებარე ადლერის საკალმახის მეპატრონეები გუდაუთის რაიონში, ოთხარსკის საკალმახეში 750 მლნ რუბლის ოდენობის ინვესტიციის ჩადებას აპირებენ. თუმცა, ამ ეტაპზე ამ მიმართულებით რაიმე კონკრეტული გადაწყვეტილებები არ არის მიღებული.

საინვესტიციო პროგრამა

აფხაზეთში რუსეთის საინვესტიციო პროგრამის ფარგლებში 2021 წლისთვის დაგეგმილი პროექტების  განხორციელება იწყება. აფხაზეთის სოციალურ-ეკონომიკური განვითარების მხარდამჭერი 2020-2022 წლების საინვესტიციო პროგრამა სულ 4.5 მლრდ რუბლს მოიცავს. ოზგანის განცხადებით, 2021 წლისთვის 1,350 მლრდ რუბლია გამოყოფილი, რომლიდანაც 226 მლნ რუბლი უკვე დახარჯულია. ჯამში 2021 წლისთვის 44 პროექტის განხორციელებაა დაგეგმილი.

რუსეთის რეგიონებთან თანამშრომლობა

სოხუმის დე ფაქტო მერმა - ბესლან ეშბამ სმოლენსკის დელეგაციას უმასპინძლა. შეხვედრაზე სოხუმსა და სმოლენსკს შორის „ბიზნესის, ტურიზმისა და ახალგაზრდული პოლიტიკის“ სფეროებში პოტენციურ თანამშრომლობაზე იმსჯელეს.

ტურიზმი

• ოჩამჩირის რაიონის სოფელ ტამიშში რუსული ინვესტიციით ტურისტული კომპლექსი „ТАМЫШ VILLAGE“ საზეიმოდ გაიხსნა. ცერემონიაში მონაწილეობა მიიღეს დე ფაქტო პრეზიდენტმა ასლან ბჟანიამ და ინვესტორი კომპანიის - „Библио-Глобус“ - გენერალურმა დირექტორმა ირინა კოსტენკომ. ბჟანიას განცხადებით, „ეს არამხოლოდ ტურისტული ობიექტის გახსნაა“, არამედ „ტამიშისა და მთელი აღმოსავლეთ აფხაზეთის აღორძინების სიმბოლოა“. ბჟანია ტამიშიდან არის და აფხაზეთში აღნიშნული ტურისტული კომპლექსის გახსნას მის ბიზნეს-ინტერესებსაც უკავშირებენ.

ტურისტული კომპლექსის ოფიციალური გახსნა. წყარო: presidentofabkhazia.org

• აფხაზეთის დე ფაქტო ტურიზმის მინისტრის თეიმურაზ ხიშბას შეფასებით, წელს ტურისტულ სექტორში ბოლო 30 წლის რეკორდი მოიხსნა. ხიშბას თქმით, გაგრაში, ბიჭვინთასა და ახალ ათონში ადგილების დაჯავშნის რიცხვი 100%-ს აღემატება. წელს აფხაზეთში 1.5 მლნ დამსვენებელს ელიან.

რუსეთ-ცხინვალის რეგიონის ეკონომიკური ურთიერთობები

კურატორის ვიზიტი

2021 წლის 26 ივლისს რუსეთის უშიშროების საბჭოს მდივნის მოადგილე რაშიდ ნურგალიევი ცხინვალის რეგიონს ესტუმრა. ცხინვალის რეგიონის დე ფაქტო პრეზიდენტ ანატოლი ბიბილოვთან შეხვედრაზე ნურგალიევმა ეკონომიკური მნიშვნელობის საკითხებიც განიხილა. მათ შორის, საინვესტიციო პროგრამის მიმდინარეობა და რეგიონის ენერგეტიკული უსაფრთხოება.  ნურგალიევმა „საზღვრისპირა“ სოფლებში ადგილობრივი მოსახლეობისთვის აშენებული სახლები და სამედიცინო პუნქტებიც დაათვალიერა. კურატორმა, ასევე, სარეზერვო ელექტროგადამცემი ხაზის მშენებლობა შეამოწმა. პროექტის განხორციელებისთვის რუსეთმა უკვე გამოყო 400 მლნ რუბლი, რასაც მომდევნო წლებში 400 მლნ რუბლამდე დაფინანსება დაემატება.

საინვესტიციო პროგრამა

რუსეთის საინვესტიციო პროგრამის ფარგლებში ცხინვალის რეგიონში კვაისას დასახლებაში ერთ-ერთი მთავარი - ლენინის ქუჩის კაპიტალური რემონტი დაიწყო. ქუჩის სიგრძე 980 მეტრია.  2019 წელს კვაისაში რუსეთის დაფინანსებით ხეთაგუროვის, კომაროვისა და გაგარინის ქუჩებიც შეკეთდა.

სოფლის მეურნეობა

ცხინვალის რეგიონმა რუსული კომპანია „Ростсельмаш-ის“ მიერ წარმოებული ხუთი ტრაქტორი მიიღო. აქედან ოთხი ცხინვალის რეგიონის დე ფაქტო სოფლის მეურნეობის სამინისტროს სესხით შეიძინეს, ხოლო ერთი რუსეთთან გაფორმებული ორმხრივი შეთანხმების ფარგლებში უფასოდ მიიღეს.