გამოცემა N21 / მიმოხილვის პერიოდი: 1-31 მაისი, 2022 / ავტორი: ანი ზირაქაშვილი

„აფხაზეთსა და ცხინვალის რეგიონში რუსეთის სამხედრო ძალების მიმოხილვა“ მზადდება პროექტის - „კრემლის პოლიტიკის გზამკვლევი აფხაზეთსა და ცხინვალის რეგიონში“ ფარგლებში. მიმოხილვის მიზანია მკითხველისთვის აფხაზეთსა და ცხინვალის რეგიონში განთავსებული რუსეთის ფედერაციის სამხედრო ძალების წვრთნებისა და რუსეთის მე-7 და მე-4 სამხედრო ბაზებთან დაკავშირებული მნიშვნელოვანი მოვლენების შესახებ ინფორმაციის მიწოდება. მიმოხილვა გამოდის თვეში ერთხელ და გამოადგება გადაწყვეტილების მიმღებთ, საჯარო მოხელეებს, მედიის, საერთაშორისო სამთავრობო და არასამთავრობო ორგანიზაციების წარმომადგენლებსა თუ სხვებს, ვისაც საქართველოს ოკუპირებულ რეგიონებში კრემლის პოლიტიკა აინტერესებთ.

* შენიშვნა: აღნიშნული მიმოხილვა არ მოიცავს ინფორმაციას მე-4 და მე-7 სამხედრო ბაზების სამხედრო მოსამსახურეებისა და აფხაზეთიდან თუ ცხინვალის რეგიონიდან რუსეთ-უკრაინის ომში მებრძოლი მოხალისეების შესახებ.

** შენიშვნა: რუსეთის ფედერაციას მე-4 და მე-7 სამხედრო ბაზის სამხედრო მოსამსახურეთა ძირითადი ნაწილი დონბასის რეგიონში, უკრაინის წინააღმდეგ საბრძოლველად ჰყავს გაგზავნილი. აქედან გამომდინარე, აფხაზეთსა და ცხინვალის რეგიონში სამხედრო წვრთნების რაოდენობა მნიშვნელოვნადაა შემცირებული.

რუსეთის სამხედრო ძალები აფხაზეთში

სამხედრო სწავლებები

აფხაზეთში რუსეთის მე-7 სამხედრო ბაზის დანაყოფებმა მაისში სხვადასხვა სახის სამხედრო წვრთნაში მიიღეს მონაწილეობა:

• მე-7 სამხედრო ბაზის ანტიტერორისტულმა ქვედანაყოფებმა პირობითი მოწინააღმდეგის შეტევა მოიგერიეს. წვრთნის ფარგლებში დივერსანტებმა სამხედრო ნაწილის ტერიტორიაზე შესვლა, მისი დანაღმვა და სამხედრო საწყობების აფეთქება სცადეს, თუმცა ბაზის ჯარისკაცებმა მათი შემჩნევა დროულად მოახერხეს, რის შემდეგაც „მოწინააღმდეგე“ საკონტროლო-გამშვებ პუნქტზევე დაბლოკეს და მათი შეტევა წარმატებით მოიგერიეს. წვრთნაში 100-მდე სამხედრო მოსამსახურე და 10 ერთეული საბრძოლო ტექნიკა იყო ჩართული, მათ შორის, BTR-82A ჯავშანტრანსპორტიორები და კამაზ-5350 „მუსტანგის“ ტიპის შეჯავშნილი ავტომობილები.
• წებელდისა და ნაგვალოუს პოლიგონებზე მოტომსროლელთა ქვედანაყოფებმა ივარჯიშეს. სამხედროებმა მაღალმობილური ჯგუფების ფარგლებში, მთის რელიეფის პირობებში ტაქტიკური მოქმედებების შესწავლა და დამუშავება დაიწყეს. წვრთნაში საჰაერო და საჰაერო თავდაცვის ძალებიც იყვნენ ჩართულნი. გამოიყენეს „Ми-8АМТШ Терминатор“-ის ტიპის ვერტმფრენებიც.  

ანტიტერორისტული ქვედანაყოფების წვრთნა აფხაზეთში. წყარო: www.sputnik-abkhazia.info

სხვა ღონისძიებები

• 9 მაისს „დიდ სამამულო ომში გამარჯვების დღის“ 77-წლისთავი აღნიშნეს. სამხედრო აღლუმში დე ფაქტო თავდაცვის სამინისტროს გარდა, მე-7 სამხედრო ბაზის სამხედრო მოსამსახურეებმაც მიიღეს მონაწილეობა.

რუსეთის სამხედრო ძალები ცხინვალის რეგიონში

სხვა ღონისძიებები

• დე ფაქტო თავდაცვის სამინისტროს ტანკისტები „სატანკო ბიათლონისთვის“ ინტენსიურ რეჟიმში ემზადებიან. წვრთნის ფარგლებში სამხედროებს სხვადასხვა დაბრკოლებით სავსე მარშრუტის გადალახვა უწევთ როგორც ინდივიდუალურად, ისე - გუნდურად. „სატანკო ბიათლონი“ რიგით მე-8 „არმიის საერთაშორისო თამაშების“ (АрМИ-2022) ერთ-ერთი კონკურსია, რომელიც რუსეთში, ალაბინოს სამხედრო პოლიგონზე გაიმართება.
• 19 მაისს ჯავის რაიონში 28 წლის აცამაზ ჯიოევი - უკრაინაში რუსეთის მხარეს მებრძოლი ოსი მოხალისე - სამხედრო პატივით დაკრძალეს. დაკრძალვას „პარლამენტისა“ და „მთავრობის“ წარმომადგენლების გარდა, მე-4 სამხედრო ბაზის სამხედრო მოსამსახურეებიც ესწრებოდნენ.
• 9 მაისს „გამარჯვების დღე“ ცხინვალის რეგიონშიც აღნიშნეს. ქ. ცხინვალში სამხედრო აღლუმში მე-4 სამხედრო ბაზის 400-მდე სამხედრო მოსამსახურემ მიიღო მონაწილეობა და წარმოდგენილი იყო 40 ერთეული საბრძოლო ტექნიკა.

2008 წლის აგვისტოს ომის შემდეგ აფხაზეთსა და ცხინვალის რეგიონში რუსეთის საოკუპაციო ძალები განთავსდა. 2010 წელს რუსეთმა აფხაზეთისა და ცხინვალის რეგიონის დე ფაქტო რესპუბლიკებთან ხელი მოაწერა შეთანხმებებს აფხაზეთისა და ცხინვალის რეგიონის ტერიტორიებზე გაერთიანებული რუსული სამხედრო ბაზების 49 წლის ვადით განთავსების შესახებ. აფხაზეთის ტერიტორიაზე განთავსებულია რუსეთის მე-7 სამხედრო ბაზა, ცხინვალის რეგიონში კი - მე-4 სამხედრო ბაზა. ორივე მათგანი რუსეთის ფედერაციის სამხრეთის სამხედრო ოლქის შემადგენლობაში შედის.