2019 წლის 18 მარტს, ცხინვალის რეგიონში 28 წლის წინათ მომხდარი მოვლენა გაიხსენეს. (ოსური მხარის შეფასებით, 1991 წლის 18 მარტს, სოფ. ერედვთან ქართველმა შეიარაღებულმა პირებმა სოფ. დმენისიდან ცხინვალისკენ მიმავალი ავტობუსი შეაჩერეს, 25 ეთნიკურად ოსი მოქალაქე დააკავეს და მათ შორის 12 მამაკაცი წამების შემდეგ ცოცხლად დამარხეს). ღონისძიებაში ცხინვალის რეგიონის დე ფაქტო პრეზიდენტმა, ანატოლი ბიბილოვმა და ცხინვალის რეგიონში რუსეთის ფედერაციის „ელჩმა“ მარატ კულახმეტოვმაც მიიღეს მონაწილეობა.

2019 წლის 18 მარტს რუსეთის ფედერაციის დელეგაცია აფხაზეთის დე ფაქტო ჯანდაცვის მინისტრ თამაზ წახნაკიას სოხუმში შეხვდა. რუსეთის დელეგაციის ვიზიტის მიზანია აფხაზეთის დე ფაქტო რესპუბლიკის მოქალაქეებისთვის სამედიცინო დახმარების  უზრუნველყოფის სამეტაპიანი გეგმის განხილვა. დელეგაციის წევრები არიან სამედიცინო-ბიოლოგიური ფედერალური სააგენტოს უფროსი ვლადიმირ უიბა და რუსეთის ჯანდაცვის მინისტრის თანაშემწე ანატოლი გულინი.

2019 წლის 15 მარტს აფხაზეთის დე ფაქტო მთავრობაში რუსეთის ფედერაციის ჩრდილოეთ კავკასიის საქმეთა სამინისტროს სამუშაო ჯგუფთან აფხაზეთის სოციალურ-ეკონომიკური განვითარების მხარდამჭერი საინვესტიციო პროგრამების განხორციელების საკითხზე კიდევ ერთი შეხვედრა გაიმართა. მსგავსი შეხვედრა 14 მარტსაც გაიმართა.

აფხაზეთს ადიღეს რესპუბლიკისა და კრასნოდარის მხარის მუსლიმთა სასულიერო სამმართველოს დელეგაცია, მუფთ ასკარბია კარდანოვის მეთაურობით, ოფიციალურად ესტუმრა. მუფთი თავის დელეგაციასთან ერთად აფხაზეთის დე ფაქტო პრეზიდენტ რაულ ხაჯიმბასაც შეხვდა.

2019 წლის 14 მარტს აფხაზეთის დე ფაქტო მთავრობაში რუსეთის ფედერაციის ჩრდილოეთ კავკასიის საქმეთა სამინისტროს სამუშაო ჯგუფთან შეხვედრაზე საინვესტიციო პროგრამების შესრულების საკითხი განიხილეს.

რუსეთის ფედერაციის საინფორმაციო სააგენტო „იტარ-ტასმა“ ჩრდილოეთ კავკასიის საქმეთა მინისტრის სერგეი ჩებოტარევის ვრცელი ინტერვიუ გამოაქვეყნა, სადაც მინისტრმა საქართველოზე, მათ შორის აფხაზეთსა და ცხინვალის რეგიონზეც ისაუბრა. ამ ეტაპზე ჩებოტარევი აფხაზეთისა და ცხინვალის რეგიონის მიმართულებით რუსეთის მთავრობაში ყველაზე გამოცდილი და ერთ-ერთი ყველაზე გავლენიანი პირია. იგი წლების განმავლობაში უშუალოდ მონაწილეობდა აფხაზეთსა და ცხინვალის რეგიონში მიმდინარე პროცესებში.

2019 წლის 14 მარტს, აფხაზეთის დე ფაქტო რესპუბლიკაში მოქმედმა „აფხაზეთის სახელმწიფო უნივერსიტეტმა“ უნივერსიტეტისა და ზოგადად დე ფაქტო რესპუბლიკის მხარდაჭერისთვის საპატიო დოქტორის წოდება მიანიჭა რუსეთის ფედერაციის სახელმწიფო, პოლიტიკურ და საზოგადოებრივ მოღვაწეებს: კონსტანტინ ზატულინს, სერგეი ბაბურინს და ანდრანიკ მიგრანიანს. მათ შორის უდავოდ გამორჩეულია ზატულინი, რომელიც წლებია პოსტსაბჭოთა ქვეყნების, განსაკუთრებით კი კონფლიქტური რეგიონების მიმართულებით მუშაობს.

2019 წლის 13 მარტს, სანქტ-პეტერბურგში, ცხინვალის რეგიონის დე ფაქტო ელჩმა რუსეთის ფედერაციაში, ზნაურ გასიევმა, სანქტ-პეტერბურგის გუბერნატორის მოვალეობის შემსრულებელ ალექსანდრ ბეგლოვთან ცხინვალის რეგიონში ინვესტორების მოზიდვისა და რეგიონში დამზადებული პროდუქციის სანქტ-პეტერბურგში რეალიზაციის საკითხები განიხილა.

რუსეთის ფედერაციის სამხრეთის სამხედრო ოლქში - რუსეთის, სომხეთის, ანექსირებული ყირიმისა და საქართველოს ოკუპირებული რეგიონების ტერიტორიებზე, 10 ათასი არტილერისტისა და სამი ათასამდე ერთეული ტექნიკის მონაწილეობით საველე სწავლება გაიმართება. სწავლება 20 სამხედრო პოლიგონზე გაიმართება და თვის განმავლობაში გაგრძელდება.

აფხაზეთში რუსეთის მე-7 სამხედრო ბაზის ტერიტორიაზე სამხედრო მოსამსახურეებისთვის 4 საცხოვრებელი სახლის მშენებლობა დასრულდა. სამხედრო ბაზის 64 მოსამსახურეს ახალგარემონტებული ბინები საზეიმო ვითარებაში გადასცეს. 2018 წელს, სამხედრო ბაზასთან ახლოს, ხუთი ასეთი საცხოვრებელი სახლი აშენდა, რის შედეგადაც 78 სამხედრო მოსამსახურის ოჯახი ბაზის სიახლოვეს დასახლდა.

2019 წლის 6 მარტს, მოსკოვში, ცხინვალის რეგიონის დე ფაქტო პრეზიდენტი ანატოლი ბიბილოვი რუსეთის ფედერაციის პრეზიდენტს, ვლადიმერ პუტინს შეხვდა. კრემლის ცნობით, მხარეებმა ორმხრივი ურთიერთობების მიმდინარეობა და პერსპექტივები განიხილეს, უპირველეს ყოვლისა კი - სოციალურ-ეკონომიკურ სფეროში.

აფხაზეთის დე ფაქტო საგარეო საქმეთა მინისტრმა დაურ კოვემ აფხაზეთში რუსეთის ფედერაციის „ელჩს“ ალექსეი დვინიანინს დაბადების დღე მიულოცა. ალექსეი დვინიანინი (ალექსეი დვინიანინის შესახებ დეტალურად იხ. აქ) დაიბადა 1967 წლის 5 მარტს ქ. ვორონეჟში, რსფსრ-ში, საბჭოთა კავშირში. 2018 წლის 30 მარტს რუსეთის ფედერაციის პრეზიდენტის ბრძანებით, დვინიანინი აფხაზეთის დე ფაქტო რესპუბლიკაში რუსეთის „ელჩად“ დაინიშნა.

მოსკოვში დასრულდა აფხაზეთის დე ფაქტო ჯანდაცვის მინისტრის თამაზ ცახნაკიას სამუშაო ვიზიტი, რომლის დროსაც რუს კოლეგებთან აფხაზეთში გადაუდებელი დახმარების სამედიცინო ცენტრის მშენებლობის, მობილური სადიაგნოსტიკო ავტომატარებლის შეძენისა და აფხაზეთის მოსახლეობის დისპანსერიზაციის საკითხები განიხილეს.

2019 წლის 5 მარტს, მოსკოვში, რუსეთის ფედერაციის ჩრდილოეთ კავკასიის საქმეთა სამინისტროში რუსეთისა და აფხაზეთის დე ფაქტო რესპუბლიკის შინაგან საქმეთა სამინისტროების ერთობლივი საინფორმაციო-საკოორდინაციო ცენტრის ფუნქციონირების საკითხი განიხილეს. სამუშაო შეხვედრას მინისტრის მოადგილე იგორ კოშინი (იგორ კოშინის შესახებ დეტალურად იხ. აქ) უძღვებოდა, რომელიც სამინისტროში აფხაზეთისა და ცხინვალის რეგიონის კურატორია.

ცხინვალის რეგიონში ძარწემის პოლიგონზე რუსეთის მე-4 სამხედრო ბაზის სამხედრო მოსამსახურეებმა აერომობილური ჯგუფების გამოყენებაში პირველად ივარჯიშეს. წვრთნები გაიმართა, როგორც ხმელეთზე, ასევე ჰაერში. 20-ზე მეტმა საავიაციო არმიის ვერტმფრენმა, პოზიციების დაკავების მიზნით, მთაგორიან ადგილებში ტაქტიკური საჰაერო დესანტის გადასხმა უზრუნველყო.