სოხუმში მრგვალი მაგიდა - „სურთ თუ არა რუსებს ომი?“ გაიმართა, რომელიც ვეტერანი მშვიდობისმყოფელების, აფხაზეთის დე ფაქტო ლიდერებისა და დამოუკიდებელ სახელმწიფოთა თანამეგობრობის ქვეყნების ინსტიტუტის ინიციტიავით ჩატარდა. დისკუსიაში მონაწილეობა მიიღო დე ფაქტო პრეზიდენტმა რაულ ხაჯიმბამ, დე ფაქტო პრემიერ-მინისტრმა ვალერი ბგანბამ, დე ფაქტო პარლამენტის სპიკერმა ვალერი კვარჩიამ და რუსეთის ფედერაციის სახელმწიფო დუმის დამოუკიდებელ სახელმწიფოთა თანამეგობრობის საქმეთა, ევრაზიული ინტეგრაციისა და თანამემამულეებთან ურთიერთობების კომიტეტის თავმჯდომარის მოადგილემ კონსტანტინ ზატულინმა.

2019 წლის 14 მარტს, აფხაზეთის დე ფაქტო რესპუბლიკაში მოქმედმა „აფხაზეთის სახელმწიფო უნივერსიტეტმა“ უნივერსიტეტისა და ზოგადად დე ფაქტო რესპუბლიკის მხარდაჭერისთვის საპატიო დოქტორის წოდება მიანიჭა რუსეთის ფედერაციის სახელმწიფო, პოლიტიკურ და საზოგადოებრივ მოღვაწეებს: კონსტანტინ ზატულინს, სერგეი ბაბურინს და ანდრანიკ მიგრანიანს. მათ შორის უდავოდ გამორჩეულია ზატულინი, რომელიც წლებია პოსტსაბჭოთა ქვეყნების, განსაკუთრებით კი კონფლიქტური რეგიონების მიმართულებით მუშაობს.

2018 წლის 13 დეკემბერს რუსეთის ფედერაციის სახელმწიფო დუმამ რუსეთსა და აფხაზეთის დე ფაქტო მთავრობას შორის დადებულ შეთანხმებას - „განათლებისა და (ან) კვალიფიკაციის ურთიერთ აღიარების შესახებ“ რატიფიკაცია გაუკეთა.