13 ოქტომბერს ცხინვალის რეგიონის დე ფაქტო პრეზიდენტმა, ალან გაგლოევმა რუსეთის ფედერაციის საბჭოს დელეგაციასთან შეხვედრა გამართა. რუსეთის დელეგაციის ხელმძღვანელი საბჭოს საერთაშორისო ურთიერთობების კომიტეტის წევრი, სერგეი ცეკოვი იყო. შეხვედრაში ასევე მონაწილეობა მიიღო რუსეთის „ელჩმა“ რეგიონში, მარატ კულახმეტოვმა.

დე ფაქტო რესპუბლიკის იუსტიციის სამინისტროსა და რუსეთის სასამართლო აღსრულების ფედერალურ სამსახურს შორის დაიდო მემორანდუმი. შეთანხმებას ხელი მოაწერა დე ფაქტო იუსტიციის მინისტრმა, ოლეგ გაგლოევმა და აღსრულების სამსახურის დირექტორმა, რუსეთის მთავარმა სასამართლო აღმასრულებელმა - დმიტრი არისტოვმა. საზეიმო ცერემონიას ესწრებოდა დე ფაქტო პრეზიდენტი, ალან გაგლოევი და რეგიონში რუსეთის „ელჩი“, მარატ კულახმეტოვი.

ცხინვალის რეგიონში „სამშვიდობო“ ოპერაციის დაწყების 29-წლისთავი აღნიშნეს და „მამულის მცველთა“ მემორიალური კომპლექსი ყვავილებით შეამკეს. ღონისძიებას დაესწრნენ „პრეზიდენტი“ ანატოლი ბიბილოვი, რუსეთის „ელჩი“ მარატ კულახმეტოვი, ასევე დე ფაქტო სამინისტროების წარმომადგენლები და სხვები.

12 ივნისს რუსეთის დამოუკიდებლობის დღე აღინიშნა. 2005 წლის შემდეგ ეს თარიღი ცხინვალის რეგიონში აღინიშნება, როგორც ერთ-ერთი „სახელმწიფო“ დღესასწაული. დე ფაქტო პრეზიდენტმა ანატოლი ბიბილოვმა რუსეთის პრეზიდენტსა და ხელისუფლების სხვა წარმომადგენლებს ეროვნული დღესასწაული მიულოცა. საღამოს კი გაიმართა საზეიმო მიღება, რომელსაც დაესწრნენ ბიბილოვი, რუსეთის „ელჩი“ მარატ კულახმეტოვი და სხვა პოლიტიკური თუ საზოგადო მოღვაწეები. „ჩვენს სამშობლოს - რუსეთს - ვუსურვებ, რომ მუდამ ძლიერი სახელმწიფო ყოფილიყოს,“ - აღნიშნა ბიბილოვმა.

რუსეთის დღესთან დაკავშირებით ქ. ცხინვალში კინოფესტივალი „Хрустальный источникъ“ გაიმართა. ფესტივალის ფარგლებში რეგიონს ეწვივნენ ცნობილი რუსი მსახიობი ნონა გრიშაევა და კინოფესტივალის პრეზიდენტი ევკლიდ კიურძიდისი. ღონისძიების ორგანიზატორები იყვნენ „როსსოტრუდნიჩესტვოს“ წარმომადგენლობა, კულტურის „სამინისტრო“ და ცხინვალის რეგიონში რუს თანამემამულეთა საკოორდინაციო საბჭო.

ქ. ცხინვალში რუსეთის დღისადმი მიძღვნილი გამოფენა გაიმართა. დამსწრე საზოგადოებამ დაათვალიერა ახალგაზრდა მხატვართა გაერთიანების „Tskhinval 5“-ის წევრთა ნამუშევრები. გამოფენა თვის ბოლომდე გაგრძელდება. გამოფენის ორგანიზატორები არიან დე ფაქტო კულტურის სამინისტრო და „როსსოტრუდნიჩესტვოს“ წარმომადგენლობა ცხინვალის რეგიონში.

4 ივნისს ქ. ცხინვალში რუსული ენის საერთაშორისო დღე და რუსი პოეტის, ალექსანდრე პუშკინის დაბადების 222 წლისთავი აღნიშნეს. საზეიმო ღონისძიება პუშკინის სკვერში გაიმართა. მას დაესწრნენ დე ფაქტო ხელისუფლებისა და რუსეთის „საელჩოს“ წარმომადგენლები, პედაგოგები და რუსისტები, სტუდენტები და სკოლის მოსწავლეები. დამსწრეთა შორის იყვნენ „როსსოტრუდნიჩესტვოს“ წარმომადგენლობის ხელმძღვანელი სერგეი სკვორცოვი და რუსეთის „ელჩი“ მარატ კულახმეტოვი.

21 მაისს ქ. ცხინვალში „მამულის მცველთა“ მემორიალური კომპლექსი გაიხსნა.

15 თებერვალს ცხინვალის რეგიონში „ინტერნაციონალისტი სამხედროების“ ხსოვნის დღე აღნიშნეს. 32 წლის წინ სწორედ ამ დღეს დატოვეს ავღანეთის ტერიტორია საბჭოთა კავშირის ჯარებმა.

ცხინვალის რეგიონში, რუსეთის ფედერაციის დე ფაქტო საელჩოში „უკვდავი პოლკის“ ორ წარმომადგენელს ვლადიმერ პუტინის სახელით ჯილდოები გადასცეს.

28 დეკემბერს რუსეთის ფედერაციის „საელჩომ“ ცხინვალის რეგიონის ბავშვებისთვის საახალწლო წარმოდგენა გამართა.

4 დეკემბერს ცხინვალის რეგიონში, ა. თიბილოვის სახელობის „სახელმწიფო“ უნივერსიტეტში ეთნოგრაფიისა და მხარეთმცოდნეობის მუზეუმი გაიხსნა.

23 ნოემბერს ცხინვალის რეგიონში „სიმამაცისა და ეროვნული ერთიანობის დღე“ აღნიშნეს და ყვავილებით შეამკეს გმირების მემორიალი. კორონავირუსით გამოწვეული ეპიდემიის გამო შეზღუდული იყო მონაწილეთა რაოდენობა.

28 ოქტომბერს ქალაქ ცხინვალში „რუსული სამყაროს“ ფონდის რუსული ცენტრი გაიხსნა.

12 ივნისს ცხინვალში რუსეთის ფედერაციის სახელმწიფო დღესასწაული - „რუსეთის დღე“ აღნიშნეს. ღონისძიება დიდების ხეივანში „მარადიული ცეცხლის მემორიალთან“ ყვავილების დადებით დაიწყო.